Día das letras galegas

Hoxe sábado 17 de maio celébrase o "Día das letras Galegas" e é festivo en Galicia. Neste día homenaxéase ás persoas que destacaron pola súa creación literaria no idioma galego, ou pola súa defensa. A data coincide co día no que se publicó en Vigo o primeiro exemplar de "Cantares Gallegos" de Rosalía de Castro, que marcou o renacemento cultural galego.

Este ano 2014, adícase a Xosé María Díaz Castro, autor do poemario Nimbos (1961) quen a pesar de falar catorce idiomas sempre defendeu o galego.


Penélope (un dos seus poemas)

"Un paso adiante e outro atrás, Galiza,

e a tea dos teus soños non se move.

A espranza nos teus ollos se espreguiza.

Aran os bois e chove.

Un bruar de navíos moi lonxanos

che estrolla o sono mol coma unha uva.

Pro ti envolveste en sabas de mil anos,

e en sonos volves a escoitar a chuva.

Traguerán os camiños algún día                   

a xente que levaron. Deus é o mesmo.

Suco vai, suco vén, ¡Xesús María!,

e toda cousa ha de pagar seu desmo.

Desorballando os prados coma sono,

o Tempo vai de Parga a Pastoriza.

Vaise enterrando, suco a suco o Outono.

¡Un paso adiante e outro atrás, Galiza!"